પહોંચવું છે… April 8, 2009
Posted by Jaydeep in ગઝલો.trackback
અધ:માં છું ને ઊર્ધ્વે પહોંચવું છે;
તળેટીથી યે શિખરે પહોંચવું છે.
કોઈ રીતે સમીપે પહોંચવું છે;
‘હું’ -’તું’ – ‘તે’ ના અભેદે પહોંચવું છે.
હતો, છું, ને હઈશ કેવળ નદીમાં;
કહ્યું કોણે કે કાંઠે પહોંચવું છે?
બધે રસ્તેથી હું પાછો વળ્યો છું;
ફક્ત એનાં જ દ્વારે પહોંચવું છે.
છે રણમાં સૂર્યની શિરમોર સત્તા;
આ નદી મૃગજળની, તીરે પહોંચવું છે.
કોઈ તારાને ખરતો રોકવાને;
મળે જો પાંખ; આભે પહોંચવું છે.
ઢળી છે સાંજ, ઈંધણ ભીનાં ભીનાં;
ઉતાવળ છે; ચિતાએ પહોંચવું છે.
-ભગવતીકુમાર શર્મા
Comments»
No comments yet — be the first.