અવતરીશ વારંવાર

મરીશ    વારંવાર,    અવતરીશ  વારંવાર

મોક્ષ ખપે ના મને હું પાછો ફરીશ વારંવાર.

હેમંતે    ધુમ્મસ     આંખોમાં   આંજી-આંજી

દ્રષ્ટિને   દ્રશ્યોથી    ઉભડક લેતો   માંજી

ઝાકળબિન્દુ આંખોમાં  હું ભરીશ  વાંરવાર.

તડકાનો   સંસ્પર્શ   મને   હું  ફાળો   રાખે

ઘ્રાણ  સતત   માટી-વાયુની  સોડમ ચાખે

સઘળું  ચાખી-ચાખી એંઠું કરીશ  વારંવાર.

આષાઢી   અવસરમાં   ભીતર મોર  ટહુકે

આંજી   દેતો   અંતરને   અજવાસ  ઝબૂકે

ટીપે-ટીપે   તારામાં   નીતરીશ   વારંવાર

હશે તું જ્યાં હું ત્યાં જ પ્રિયે! આવીશ ફરીથી

ફરી    ધરીને   દેહ તને  ચાહીશ   ફરીથી

હાથ  સુકોમળ ઝાલીને સંચરીશ વારંવાર.

                                  — નીરજ મહેતા