jump to navigation

ભીડમાં… March 9, 2012

Posted by Jaydeep in પ્રકીર્ણ.
Tags:
add a comment

સૂમસામ છે બધુંય સંબંધોની ભીડમાં

આવ્યાં ભલે બધાય પ્રસંગોની ભીડમાં.

 

તરતા મૂક્યા હતા ધીરેક તારી યાદમાં

દીવા તણાઈ જાય તરંગોની ભીડમાં.

 

એ સાથમાં હતી છતાંય ત્યાં હતી નહીં

દોરી મળે ન ક્યાંય પતંગોની ભીડમાં.

 

શોધું છું શામળા તે સામે જ તો હતા

ખરચાઈ ગઈ ક્ષણો તો અભંગોની ભીડમાં.

 

રસ્તોય આ રહ્યો ને ના દૂર મંઝિલો

અટવાઈ ગ્યા અમે તો સંતોની ભીડમાં.

 

જે પામવાને માટે આપે કરી સફર

ખોવાઈ એ ક્ષણો જ પ્રબંધોની ભીડમાં.

 

વણજો ગઝલનું પોત જરા ધ્યાન રાખીને

બદલાઈ જાય અર્થો શબ્દોની ભીડમાં.

 

રડવું ત્યજીને મ્હેતા એનો કરો જશન

તમને મળ્યું છે શ્વેત જે રંગોની ભીડમાં.

                                     — મધુમતી મહેતા